Жамбыл облысының әкімі Бердібек Сапарбаев Қордай ауданында жаппай қақтығыстан кейін жергілікті ауқымдағы техногендік сипаттағы төтенше жағдай неге жарияланғанын айтты. Ол болған жағдай әлеуметтік сипаттағы төтенше жағдай режиміне сәйкес келмегенін атап өтті. Бұл туралы informburo.kz хабарлады.
«Онда көптеген тұрғын үйлер зақымдалып, өрт пайда болды,сондықтан тәртіп орнату үшін техногендік сипаттағы ТЖ жарияланды. Бұл төтенше жағдай әлеуметтік жағдайға жатпайды. Ол-техногенді сипаттағы, себебі бізге барлық тұрғын үйлерді, сауда нүктелерін, автожолдар мен көшелерді қалпына келтіру қажет. Бұл жерде әлеуметтік сипат жоқ, жалғыз нәрсе-қаза тапқан және асыраушыларынан айырылған отбасыларға заңнамаға сәйкес әлеуметтік көмек көрсетіледі», – деп Сапарбаев хабарлады.
Оның айтуынша, қазіргі уақытта келтірілген залалдың нақты сомасын айтуға болмайды.
«Үкімет тобы жұмыс істейді, барлық тұрғын үйлерді, сауда нүктелерін тексереді. Жақында біз шығын сомасын белгілейміз, сондай-ақ Үкіметке ұсыныстар енгізіледі деп ойлаймын. Сонымен қатар, біз қазір зардап шеккендер мен олардың отбасы мүшелеріне көмек көрсету үшін бизнесмен, зардап шеккен ауылдардан шыққан адамдармен талқылаймыз», – деп түсіндірді облыс басшысы.
Қордай ауданында жаппай тәртіпсіздік салдарынан он адам көз жұмды, 178 азамат түрлі дәрежедегі жарақат алды. Қақтығыс барысында 36 тұрғын үй, 11 коммуналдық нысан және 44 көлік зақымдалды.
Сурет: centralasia.media
