Жамбыл облысы төтенше жағдайлар департаменті “Өрт сөндіру және апаттық-құтқару жұмыстары қызметі” ММ қызметкерлері әріптестеріне төтенше жағдайлардың салдарын жою және апаттық-құтқару жұмыстарына көмектесу үшін Түркістан облысына барды. Бұл туралы “Қазақпарат” ақпарат агенттігі хабарлады.
Елді мекендерді су басқан Түркістан облысына 50 құтқарушы, 9 бірлік арнайы техника, 15 мотопомпа және үш қайық жіберілді. Топ жетекшісі Жамбылдық өрт сөндіру және апаттық-құтқару жұмыстары қызметі бастығының орынбасары Юрий Салагаев.
Түркістан облысына жіберер алдында Жамбыл құтқарушыларымен азаматтық қорғау полковнигі Мансур Шайкрамов кездесіп, қауіпсіздік техникасы ережелерін еске салып, оларға үлкен үміт артты.
Бұрын хабарланғандай, Өзбекстан Республикасында Сардоба су қоймасының бөгеті жарылып, нәтижесінде Мақтаарал ауданының коллекторлары суға толды, елді мекендерді су басуына себеп болды.
Осыған байланысты Өзбекстанда қылмыстық іс ашылды. Қазіргі уақытта Өзбекстан мемлекеттік қауіпсіздік қызметінің органдары қажетті тергеу іс-шараларын жүргізуде.
Сурет: inform.kz
