Біздің республикада «Цифрлық Қазақстан» бағдарламасын жетілдірумен айналысатын жұмыс тобының бірінші отырысы өтті. Бұл туралы «Қазақпарат» ақпарат агенттігі хабарлайды.
Отырыс бейнеконференция байланысы режимінде өтті. Оған IT-компаниялардың басшылары мен байланыс операторлары, мемлекеттік органдар мен квазимемлекеттік сектор өкілдері қатысты.
Қазақстан цифрлық даму министрлігінің басшысы Асқар Жұмағалиев бейнеконференцияны аша отырып, цифрландыру бағдарламасын жетілдіруді мемлекет басшысы Қасым-Жомарт Тоқаев тапсырғанын, сондықтан сарапшыларға бұл мәселеге шындап кірісу керектігін айтты.
«Бар бизнес-үдерістердің жекелеген элементтерін цифрлап кою жеткіліксіз. Цифрландыру, шын мәнінде, — бұл процестердің өздерін өзгерту. Дәл осындай кешенді міндетті мемлекет басшысы алдымызға қойды», — деді министр.
Бейнеконференция барысында жұмыс тобының мүшелері халықтың сауаттылығын арттыру, ақпараттық қауіпсіздік саласын дамыту және сандық қоғам құру бойынша өз ұсыныстарын айтты.
Отырыс соңында «Цифрлық Қазақстан» бағдарламасын жетілдіру бойынша ұсыныстарды жедел әзірлеу мақсатында бұл мәселені тақырыптық шағын топтарда талқылауды жалғастыру туралы шешім қабылданды.
