Қырғыз Республикасынан Қазақстан Республикасы мен Ресей Федерациясына және кері бағытта өткізілетін тауарлар мен автокөлік құралдарының мониторингі бойынша пилоттық жоба ұзартылды. Бұл туралы Қырғыз Республикасының Мемлекеттік салық қызметінің баспасөз қызметі хабарлады.
Тиісті шешімге Қырғыз Республикасы мен Қазақстан Республикасы салық органдарының басшылары қол қойды.
Бұрын 2020 жылдың 10 желтоқсанына дейін белгіленген пилоттық жоба енді 2021 жылдың 10 наурызына дейін әрекет ететін болады.
Осы кезеңде тауарларды Қырғыз Республикасынан Қазақстан мен Ресейге және кері бағытта тасымалдау кезінде, өздігінен жүретін тауарларды қоспағанда, автокөлігінің жүк бөлігіне навигациялық пломба ілінетін болады.
7 минуттан аспайтын рәсімді Қазақстан Республикасы Қаржы министрлігі Мемлекеттік кірістер комитетінің қызметкері жүзеге асыратын болады.
Тасымалдаушылардың пилоттық жобаға қатысуы ерікті және өтеусіз негізде жүзеге асырылады.
Бұл ретте пилоттық жобаға қатысу шеңберінде навигациялық пломбалармен келе жатқан жүк автокөлік құралдарына қатысты өткізу пункттерінде және арнайы бөлінген орындарда (“Барыс” және басқалар), сондай-ақ жүру жолында бақылаудың қосымша түрлері жүргізілмейді.
Сурет: inform.kz
