Өзбекстан құс және мал шаруашылығы өнімдерінің барлық түрлерінің транзитіне және Қазақстан Республикасынан әкелуге бұрын енгізілген уақытша шектеулерді алып тастады. Бұл туралы Ауыл шаруашылығы министрлігі хабарлады, деп хабарлайды zakon.kz.
Өзбекстан Республикасының ветеринария және мал шаруашылығын дамыту мемлекеттік комитеті 2021 жылғы 19 наурыздан бастап тірі құсты (оның ішінде сәндік құстарды), инкубациялық жұмыртқаны, мамық пен қауырсынды, құс етін, жұмыртқаны және құс шаруашылығы өнімінің басқа да түрлерін, сондай-ақ Қазақстан Республикасынан құстарды күтіп-бағуға, союға және бөлшектеуге арналған бұрын пайдалануда болған жабдықты ӨР аумағына әкелуге және транзитіне бұрын енгізілген уақытша шектеулерді алып тастады.
Сондай-ақ, тірі жануарларды, оның ішінде серіктес жануарларды, жабайы, цирк және хайуанаттар бағы жануарларын, шикі ет пен ет өнімдерін, жылумен өңделмеген сүт және сүт өнімдерін, генетикалық материал, жүн, шаш, қыл, ішек шикізаты, тері және былғарыны, ҚР Шымкент қаласы мен Ақмола облысынан жануарларды ұстауға және союға арналған жабдықты әкелуге және транзитіне уақытша шектеулер алынып тасталды.
