Ақордада елімізде коронавирустық инфекция эпидемиясы кезеңінде медициналық препараттардың алыпсатарлық және заңсыз айналымы фактілерінің жолын кесу бойынша жүргізіліп жатқан жұмыстар туралы айтты, деп хабарлайды informburo.kz жаңалықтар ресурсы.
Ақорда өкілдері бұл жұмыс президент Қасым-Жомарт Тоқаевтың тапсырмасын орындау мақсатында жүргізіліп жатқанын еске салды.
Мәселен, бүгінгі таңда Қазақстанда дәріханалар дәрі-дәрмектерді негізсіз жоғары бағамен сатқан мыңға жуық жағдай анықталды. Мысалы, Батыс Қазақстан дәріханаларының бірі “Арбидолды” бекітілген 2312 теңгенің орнына 5 мың теңгеге сатқан.
Сонымен қатар, Қазақстанда медициналық препараттар мен бұйымдарды заңсыз сатудың 300-ден астам фактісі анықталды. Яғни, олар дәріханалардан тыс жерде сатылды, ал сатушыларда лицензиялар мен қауіпсіздік сертификаттары болмаған.
Ақордада хабарлағандай, заңсыз айналымнан барлығы 10 миллионнан астам дәрі-дәрмектер мен медициналық бұйымдар алынды, олардың жалпы сомасы 230 миллион теңгеден асады.
Ақордада анықталған фактілер бойынша әр түрлі әкімшілік жауапкершілікке 1183 адам тартылғанын атап өтті. Медициналық препараттарды алыпсатарлық пен олардың заңсыз айналымының жолын кесу жұмыстары жалғасуда.
Сонымен қатар, Қазақстанның Денсаулық сақтау министрлігінде бөлшек сауда үшін шекті баға белгіленетін дәрі-дәрмектер тізбесін кеңейту мүмкіндігі пысықталуда.
Сурет: aif.ru
