Қызылорда облысында прокуратураның бастамасымен заңсыз ойын орындарының алдын алу, анықтау және жолын кесу мақсатында мобильдік топ құрылды. Бұл туралы Қызылорда облысы прокуратурасының баспасөз қызметі хабарлайды.
Соңғы бірнеше жылда заңсыз ойын бизнесін ұйымдастырғаны үшін өңірде 88 қылмыстық іс қозғалып, 94 азамат сотталды. Заңсыз айналымнан екі жүзден астам ойын автоматтары тәркіленіп, жойылды.
Мысалы, тергеу іс-шараларының нәтижесінде қалада желілік ойын бизнесімен айналысатын қылмыстық топ табылды. Олар Қызылордада заңсыз бес ойын орнының желісін ұйымдастырды.
Сот олардың кінәсін Қазақстан Қылмыстық кодексінің 262-бабының 1-бөлігі («ұйымдасқан топ, қылмыстық ұйым құру және оны басқару, сол сияқты оларға қатысу») және қылмыстық кодекстің 307-бабының 3-бөлігінің 1-тармағы («Заңсыз ойын бизнесін ұйымдастыру») бойынша мойындады. Қылмыскерлер 7 жылдан астам мерзімге бас бостандығынан айыруға сотталды.
Қалада заңсыз ойын бизнесімен күрес күшейе түсуде.
Тергеуге көмектесуге ниет білдірушілер, қырағы азаматтар өздерінің арыздары мен хабарламаларымен жасырын сенім телефон желісі бойынша хабарласа алады: 8 (7242) 26-20-06
Сурет: irest.su
