Он бес жасар Дамир Базаев ресми түрде мемлекеттік қызмет істері және сыбайлас жемқорлыққа қарсы іс-қимыл агенттігінің облыстық департаменті басшысының штаттан тыс кеңесшісі болды. Бұл туралы ведомствоның баспасөз қызметі ақпарат таратты, деп хабарлайды Kazpravda. kz.
9 сынып оқушысы “Атал ұрпақ” ерікті мектеп клубының белсенді мүшесі, оқу озаты, бірнеше дипломдар мен алғыс хаттардың иегері.
“Біз оқушылар арасында сыбайлас жемқорлыққа қарсы тәрбие жүргіземіз. Оларды адал еңбекке шақырамыз. Бұл мәселеде бізге “Адал ұрпақ” клубы белсенді көмек көрсетуде”, – деді агенттіктің Қызылорда облысы бойынша департаментінің басшысы Абзал Мұхимов.
Жаңа кеңесшінің айтуынша,ол облыс бойынша ерікті мектеп клубтарының жұмысын ілгерілетумен айналысатын болады.
“Бүгін аталмыш клубтардың қызметін ілгерілетумен тікелей айналысатын жас басшы кеңесшісін тағайындады. Оны ең жас кеңесші деп атауға болады. Біз оқушыларға сыбайлас жемқорлыққа қарсы тәрбиені өз құрдастарының тілінде жеткізу керек деп санаймыз”, – деді облыстық департамент басшысы.
Дамир Базаев мектеп ортасында сыбайлас жемқорлыққа қарсы мәдениетті қалыптастырып, “Адал Ұрпақ” клубтарының қызметін үйлестіретін болады, деп хабарлады департаменттің баспасөз қызметі.
Сурет: Қызылорда облысы бойынша АДГСП департаментінің баспасөз қызметі
