Қасым-Жомарт Тоқаевтың Мемлекет басшысы лауазымындағы саясаты сабақтастық пен тұрақтылықты сақтай отырып, әлеуметтік сипатқа ие болады. Мұндай пікірді ҚХР қоғамдық-саяси және сараптамалық топтарының өкілдері Қасым-Жомарт Тоқаевтың инаугурациялық сөзін талдай отыра айтты, деп хабарлайды Қытайдағы «ҚазАқпарат» ХАА меншікті тілшісі.
Белгілі қоғам қайраткері және жазушы, Қытай Халық саяси консультативтік кеңесінің бұрынғы депутаты, әдебиет саласындағы мемлекеттік сыйлықтың лауреаты Ақбар Мәжиттің айтуынша, ҚР Президенті Қасым-Жомарт Тоқаевтың сөйлеген сөзі мемлекет саясатының басымдылығы әлеуметтік сала болатынын айғақтайды. «Ел дамуының 10 негізгі бағыты ҚР Үкіметінің алдына Қазақстан халқының өмір сүру сапасы мен жайлылығын арттыру, білім беру, денсаулық сақтау және мәдениет саласын дамыту бойынша міндеттер қояды», — деді ол.
Ақбар Мәжит Қасым-Жомарт Тоқаев ҚР Тұңғыш Президенті — Елбасы Нұрсұлтан Назарбаевтың саяси және экономикалық бағытын жалғастыруды, Қазақстанды Үшінші жаңғыртуды, бес институционалдық реформаны, көпвекторлы сыртқы саясатты жүзеге асыруды, шағын және орта бизнесті қолдауды кеңейтуді және сандық экономиканың даму бағытын жалғастыруды көздегенін атап өтті.
«Қасым-Жомарт Тоқаевтың 10 тапсырмасын тиімді шешу Қазақстанға тұрақты дамудың жаңа деңгейіне шығуға, инновациялық үдерістерді жеделдетуге, еңбек өнімділігін арттыруға және Қазақстан халқының өмір сүру сапасының индексін жақсартуға мүмкіндік береді», — деп атап өтті А. Мәжит.
«Мемлекеттік саясатта сабақтастық пен тұрақтылық басым болады. Сонымен қатар, Қасым-Жомарт Тоқаев өз жұмысында әлеуметтік үйлесімділікті қамтамасыз етуге және жастарды қолдауға көп көңіл бөледі», — деді ол.
Естеріңізге сала кетейік, 2019 жылғы 12 маусымда ұлықтау рәсімінде Қасым-Жомарт Тоқаев президент ретіндегі қызметінің маңызды он бағытын атап өткен болатын: халықтың табысын арттыру, сыбайлас жемқорлыққа қарсы күрес, сот және құқық қорғау жүйесін реформалау, жаңа жұмыс орындарын құру және еңбекке ақы төлеудің лайықты деңгейімен қамтамасыз ету, тұрғын үй мәселесін шешу, әділ әлеуметтік саясат, өңірлерді дамытудың жаңа бағыты, «Рухани жаңғыру» бағдарламасын жүзеге асыруды жалғастыру, көпвекторлы сыртқы саясаттың теңгерімділігі, жастардың дамуы үшін жағдай жасау.
