Қазақстан Денсаулық сақтау министрлігінің басшысы Елжан Біртанов Қытай елшісі Джанг Сианмен кездесті. Кездесуде коронавирусқа қатысты жағдай қарастырылды Бұл туралы ҚР Денсаулық сақтау министрлігінің баспасөз қызметі хабарлады.
Кездесу барысында Қазақстан министрі мен Қытай елшісі коронавирусты инфекцияның таралуына қарсы әрекет ету мәселелерін талқылады.
Қытай елшісі жақын арада бұл вирус жойылатынына сенім білдірді. Сонымен қатар, ол Қазақстан Үкіметі қабылдаған, инфекцияның республикамызға енуіне жол бермеуге бағытталған шараларына жоғары баға берді.
Елжан Біртанов өз кезегінде бүкіл қытай халқына зор шыдамдылық пен мемлекеттегі эпидемиологиялық жағдайдың тез арада жақсаруын тіледі.
Кездесу соңында қатысушылары вирустық инфекциямен күресуде өзара іс-әрекетті және Қазақстан Республикасында коронавирустың таралуына жол бермеу бойынша жұмысты жалғастыруға келісті.
Соңғы мәліметтер бойынша, Қытайда коронавирус ауруымен ауырғандардың жалпы саны 75 мың адамнан асады. Сонымен қатар, инфекцияны жұқтыру салдарынан 2 мыңнан астам адам өлімі тіркелді.
Сурет: interfax.ru
