Қырғызстанның ұлттық қауіпсіздік комитеті осы елдің экс-президенті Алмазбек Атамбаев тергеу изоляторына қамалғанын хабарлады, деп жазады zakon.kz жаңалықтар ресурсы.
Ведомство Атамбаевтың заңсыз бостандыққа шыққанын айтты. Оның себебі мынада. Жаппай тәртіпсіздіктер кезінде наразылық білдірушілер Бішкек Первомай сотының судьясына қысым көрсеткен, соның нәтижесінде бұрынғы президентті босату туралы қаулыға қол қойған.
Қазіргі уақытта әскери прокуратураның іс жүргізуінде алты қылмыстық іс жатыр, олар бойынша Атамбаев күдікті ретінде өтуде. Сонымен бірге, екі іс бойынша – қылмыс беделдісі Азиз Батукаевты заңсыз босатуға және 2019 жылдың 7-8 тамызындағы Кой-Таштағы оқиғаларға байланысты сот процестері жүріп жатыр.
Сонымен қатар, Қырғыз Республикасының бұрынғы басшысы Бішкекте 6 қазанға қараған түні болған жаппай тәртіпсіздіктерді ұйымдастырды деп күдікке ілінді.
Бұған дейін Алмазбек Атамбаев Қырғызстанның қазіргі президенті Сооронбай Жээнбековтен қызметінен кетуін талап еткені хабарланған.
Сурет: zakon.kz
