Қырғызстан -Тәжік шекарасында жағдай тағы да шиеленісіп кетті. Бұл туралы Қырғызстан мемлекеттік шекара қызметінің қоғаммен байланыс және БАҚ бөлімі хабарлады.
Ведомствоның ақпаратына сәйкес, Қырғызстан мемлекеттік шекара қызметінің төрағасы Ұларбек Шаршеев пен Баткен облысындағы Үкіметтің өкілетті өкілі Акрам Мадумаровтың қатысуымен шекараға жақын тұратын халыққа түсіндіру жұмыстары өтіп жатқан кезде Тәжікстан тарапынан екі жеке оқ атқан. Осы атыстың нәтижесінде Қырғызстан МӨҚҚ қызметкері жарақат алды.
Оқиға салдарынан шекараның осы учаскесінде қызмет атқарып жүрген барлық шекара бөлімшелері күшейтілген қызмет түріне ауыстырылды.
Исфара-Ворух автомобиль жолында автокөлік қозғалысы тоқтатылды. Сондай — ақ, Тәжікстан тұрғындары Исфана-Баткен тас жолындағы қозғалысты тоқтатты.
Бүгін Қырғызстан мен Тәжікстанның шекара ведомстволары басшыларының атыс жағдайын анықтау және келіссөздер жүргізу үшін кездесуі жоспарланып отыр.
Естеріңізге сала кетейік, 22 шілдеде Қырғызстан мен Тәжікстанның шекара маңындағы ауыл тұрғындары арасында қақтығыс орын алған. Оның себебі Тәжікстан тарапынан тутұғыр орнату болды. Бұл іс-әрекет қырғыз халқын дүрліктірді. Нәтижесінде олар бір-біріне тас лақтырып, атыс қаруымен ата бастады. Қақтығыс кезінде 14 адам зардап шекті.
Сурет: Inform.kz
