Қазақстан Республикасының Президенті Қасым-Жомарт Тоқаев Қырғызстандағы әріптесі Сооронбай Жээнбековпен телефон арқылы сөйлесті. Бұл туралы ҚР Президентінің баспасөз қызметі хабарлады.
Телефон арқылы сөйлесу кезінде бауырлас ел — Қырғызстан президенті Қасым — Жомарт Тоқаевқа инфекция белсенді таралып отырған Қытайдың Ухань қаласынан Қырғыз Республикасының азаматтарын көшіруге көмектескені үшін алғыс айтты.
Сондай-ақ көршілес екі мемлекеттің президенттері Қазақстан-Қырғыз ынтымақтастығы мәселелеріне назар аударды. Стратегиялық серіктестік пен одақтастық қатынастарды нығайтуға қатысты мәселелер қаралды.
Қасым-Жомарт Тоқаев пен Сооронбай Жээнбеков екі еларасындағы кедендік шекараларда жүк тасымалдау рәсімдерін жеңілдету үшін сандық технологиялар саласындағы өзара іс-әрекет мәселелерін қозғады.
Бұған дейін Қазақстан Республикасының бас санитарлық дәрігері Жандарбек Бекшин шұғыл көмектің Ұлттық үйлестіру орталығы Уханьнан біздің еліміздің азаматтары ғана емес, Беларусь, Қырғызстан, Армения азаматтарын эвакуациялады деп айтқан болатын.
Сурет: kp.ru
