Құқық қорғау органдарының қызметкерлері Ақтауда салынып жатқан тұрғын үй кешенінің үлескерлерін алдап кеткен «Тастемір ЛТД» құрылыс фирмасының басшысын ұстады, деп хабарлайды «ҚазТАГ» ақпараттық ресурсы.
5 қарашада Ақтауда өткен митингте үлескерлер тұрғын үй кешеніне ақша салғанын мәлімдеді, бірақ құрылыс салушы оны аяқтамаған, байланысқа да шықпай қойған.
Сонымен қатар, құрылыс компаниясы бір пәтерлерді бірнеше адамға сатып, кейін салымшылардың ақшасын алып жоқ болып кеткен.
Митинг барысында үлескерлер туындаған проблемаға билік назар аударып, оны шешуге көмек көрсетуін сұрады. Олар билік органдарынан тұрғын үй кешенінің құрылысын аяқтайтын адал құрылысшыны табуды сұрады.
Енді алаяқ құрылыс фирмасының басшысы ұсталды. Маңғыстау полиция департаментінің хабарлауынша, оған қатысты алаяқтық бабы бойынша қылмыстық іс қозғалды.
Полиция департаменті қазіргі уақытта күдікті тергеу изоляторына қамалғанын айтты. Сонымен қатар, оған қатысты сотқа дейінгі барлық қажетті тергеу рәсімдері жүріп жатыр.
