Қазақстан Үкіметі басшысының орынбасары Бердібек Сапарбаев Қызылорда облысының жұртшылығымен кездесу барысында келер жылы біздің республикада зейнетақы көлемі ұлғаятынын айтты.
Кездесуге қатысушылар алдында сөз сөйлеген премьер-министрдің орынбасары еліміздің азаматтары зейнетақыға қанша ақша төлейтінін айтып,басқа мемлекеттердің көрсеткіштерін мысалға келтірді.
“Бүгінгі күні қазақстандықтар орта есеппен зейнетке шамамен 11% төлейді. Сингапурда бұл сан 37%, көршілес Ресейде – 20%, Еуропа елдерінде – 20-дан 30%-ға дейін. Біз 5% ұсынған кезде аталған елдердің пайызына сүйендік.Жұмыс беруші жұмысшысының болашағы туралы ойлануға тиіс.Ертең зейнетке шыққан кезде қосымша ақша төлеу керек”, – деді Сапарбаев.
Сондай-ақ, аймақ жұртшылығымен кездесу барысында Бердібек Сапарбаев атаулы әлеуметтік көмек алатын еңбекке қабілетті азаматтар жұмыс істеуі тиіс деп мәлімдеді. Егер олар жұмыс істемейтін болса, онда әлеуметтік төлем төлеу тоқтатылады.
Сонымен қатар, вице-премьер мемлекет өзінің әлеуметтік міндеттемелерін толық көлемде атқаратынын атап өтті. Бұл салаға республикалық бюджет қаражатының жартысына жуығы бөлінді. Ағымдағы жылдың тоғыз айы ішінде атаулы әлеуметтік көмек төлеуге 200 миллиард теңгеден астам қаржы бағытталды.
