Қазақстан Үкіметі басшысының орынбасары Бердібек Сапарбаев Қызылорда облысына жұмыс сапары барысында мұғалімдер және білім беру саласы қызметкерлерімен кездесті.
Кездесуге қатысушылар алдында сөйлеген сөзінде премьер-министрдің орынбасары Қазақстан президенті Қасым-Жомарт Тоқаевтың Қазақстан халқына Жолдауында айтылған міндеттердің орындалу барысы туралы айтты.
Сонымен қатар Бердібек Сапарбаев Президент Тоқаевтың тапсырмасы бойынша педагог мәртебесін арттыруға және олардың материалдық қамтамасыз етілуін жақсартуға қатысты мәселелер шешілетіндігін атап өтті. Оның айтуынша, тиісті заң жобасы Парламентте қарастырылуда.
«Әрбір елдің дамуы азаматтарының білім деңгейі,денсаулық сақтау, мәдениетіне байланысты. Біздің балаларымыздың халықаралық стандарттарға сәйкес сапалы білім алуы маңызды. Сондықтан біз мұғалімдердің мәртебесін, олардың материалдық қамтамасыз етілуін арттыруымыз керек. Президенттің тапсырмасы бойынша 4 жыл ішінде мұғалімдердің жалақысы екі есеге артады. Келешекте біздің мұғалімдер мен дәрігерлердің жалақысы ел бойынша орташа жалақыдан жоғары болуы тиіс», — деді Сапарбаев.
Сонымен қатар, министрлер кабинеті басшысының орынбасары оқу орындары директорларының жалақысы сапалы көрсеткіштерге тікелей байланысты болу керек екенін атап өтті.
«Мысалы, мектепте 4000 бала, ал көрші мектепте 500 бала оқиды. Жүктеме әр түрлі, ал директорлардың жалақысы бірдей.Оқу сапасы, «Алтын белгі» түлектерінің саны, мектептегі тәртіп және т.б. ескерілмейді. Бұл мәселелердің барлығы жаңа заңда ескерілетін болады», — деді Сапарбаев.
