Қазақстан үкіметі басшысының орынбасары Бердібек Сапарбаев Ақмола облысына жұмыс сапары аясында Көкшетау қаласының медициналық қызметкерлерімен кездесті, деп хабарлайды Қазақстан Республикасы премьер-министрінің баспасөз қызметі.
Кездесу барысында вице-премьер медицина қызметкерлеріне денсаулық сақтау саласын реформалау жөніндегі жоспарлар туралы айтты. Сонымен қатар, Сапарбаев алдағы үш жылда елімізде денсаулық сақтау саласының бюджеті екі есе артып, медициналық жабдықтар жаңартылатынын және медицина кадрларының тапшылығы мәселесі шешілетінін атап өтті.
Сондай-ақ, Қазақстан премьер-министрінің орынбасары өңірдің денсаулық сақтау саласындағы өзекті мәселелерін де қозғады. Оның айтуынша, бүгінгі таңда облыста міндетті әлеуметтік медициналық сақтандыру жарналары жиілігінің төмендігі байқалады.
«Бүгінде жаңа жүйе енгізілгенге дейін әрбір тұрғын туралы ойланып, жүйеден түспеуі үшін өзін-өзі жұмыспен қамтыған және жұмыссыз азаматтармен жеке жұмыс істеу қажет», — деді Бердібек Сапарбаев.
