Қазақстан Үкіметі басшысының орынбасары Бердібек Сапарбаев жұмыс сапарымен Ақмола облысының Аршалы ауданына барды. Бұл туралы вице-премьердің баспасөз қызметі хабарлады.
Бастапқыда Премьер-министрдің орынбасары Иманжүсіп Құтпанұлы атындағы мектепте болып, оқу мекемесінің кабинеттерін тексеріп, оқушылармен әңгімелесті.
«Кез келген мемлекеттің дамуы бірінші кезекте азаматтардың білімі, мәдениеті және тәрбиесінің деңгейіне байланысты. Сондықтан біздің ел басшылығы әлеуметтік салаға ерекше көңіл бөледі. Елбасының тапсырмасы бойынша педагогтардың мәртебесін көтеру туралы заң әзірленді, ел Президенті мұғалімдердің жалақысын екі есеге арттыру міндетін қойды. Біздің елімізде қандай жұмыстар жүргізіліп жатқанын, қазіргі заманғы мектептер, балабақшалар, ауруханалар, театрлар, спорттық құрылыстар салынатынын жақсы білесіздер. Мұның бәрі Қазақстанның әлемдік қауымдастықта лайықты орын алуына бағытталған», — деді Сапарбаев.
Сондай-ақ, Бердібек Сапарбаев жұмыс сапары аясында «Джамиля» жиһаз фабрикасында болды. Онда ол кәсіпорынның жұмысымен танысып, фабрика ұжымымен кездесті.
Сонымен қатар, вице-премьер Ақмола облысының әкімі Ермек Маржықпаевпен кездесті. Әңгіме барысында Сапарбаевқа Аршалы ауданының әлеуметтік-экономикалық дамуы туралы мәлімет берді. Сонымен қатар, тараптар ауданның инфрақұрылымдық жобаларын дамытуға қатысты мәселелерді талқылады.
