БАӘ-ге ресми сапары аясында Президент Қасым-Жомарт Тоқаевтың Абу-Дабидің мұрагер ханзадасы шейх Мұхаммед бен Заид Әл Нахаянмен кездесуі өтті, кездесу барысында ынтымақтастық туралы бірқатар құжаттарға қол қойылды. Бұл туралы Ақорданың баспасөз қызметі хабарлады.
Мәселен, Қазақстан мен БАӘ энергетика министрліктері арасында мұнай-химия өнеркәсібі саласындағы ынтымақтастық туралы меморандумға қол қойылды.
Сонымен қатар, Қазақстан Сауда министрлігі мен Біріккен Араб Әмірліктерінің Экономика министрлігі арасында өзара түсіністік туралы меморандумға қол қойылды.
Сондай-ақ, Тоқаевтың Абу-Дабидің мұрагер ханзадасымен кездесуі кезінде тағы бір құжатқа қол қойылды. Ол АХҚО қаржы қызметтерін реттеу жөніндегі комитеті мен БАӘ Орталық Банкі арасындағы өзара түсіністік туралы меморандум.
Шейх Мұхаммед бүгінгі таңда БАӘ билігі Қазақстан Республикасымен екіжақты ынтымақтастықты дамытуға байланысты мәселелерге ерекше назар аударатынын мәлімдеді.
Қасым-Жомарт Тоқаев өз кезегінде сұхбаттасушысына қонақжайлығы үшін алғысын білдіріп, оның сапары екі ел арасындағы өзара қатынастың одан әрі дамуына айтарлықтай серпін беретінін атап өтті.
Сурет: akorda.kz
