Қазақстан президенті Жапонияның премьер-министрі Ёшихидэ Сугамен телефон арқылы сөйлесті. Екі ел басшыларының бірінші рет сөйлесіп отырғанын ескеріп, Қасым-Жомарт Тоқаев Ёшихидэ Суганы Жапония премьер-министрі болып сайлануымен құттықтап, оның аса жауапты қызметіне толағай табыс тіледі деп хабарлайды Ақорда.
Мемлекет басшысы Токиода өтетін жазғы Олимпиада ойындарына байланысты Жапония халқына жүрекжарды сәлемін жолдап, аталған ауқымды шара адамзаттың коронавирусты жеңгенінің көрінісі болатынына сенім білдірді. Президент Жапония Үкіметінің COVID-19 індетіне қарсы күресте Қазақстанға көрсеткен қолдауы мен гуманитарлық көмегі үшін алғыс айтты. Қасым-Жомарт Тоқаев қазіргі уақытта еліміз пандемияның салдарын еңсеру үшін нақты шаралар қабылдағанын, халыққа жаппай вакцина егу жұмыстарының, оның ішінде, «QazVac» отандық екпесінің де салынып жатқанын атап өтті.
