Мемлекет басшысы Қасым-Жомарт Тоқаев Өзбекстан Республикасы Парламенті Сенатының төрағасы Танзила Нарбаеваны қабылдады. Бұл туралы Ақорданың баспасөз қызметі хабарлады.
Келіссөз барысында Қасым-Жомарт Тоқаев Өзбекстан Парламенті жоғарғы палатасы төрағасының Нұр-Сұлтанға ресми сапары екі мемлекет арасындағы достық қарым-қатынастарды одан әрі дамытуға серпін беретінін айтты.
“2018 жылы сауда көлемі 2,5 млрд долларға жетті. Биылғы жылдың 9 айында ғана ол өткен жылдың көрсеткішінен асып түсті, яғни жыл соңында, әрине, біздің елдеріміз арасындағы сауда көлемі айтарлықтай болады”, – деді Тоқаев.
Сонымен қатар, президент Өзбекстанға барған ресми сапарына назар аударды, оның қорытындысы бойынша екі ел арасындағы сауда-экономикалық саладағы ынтымақтастықты кеңейту туралы уағдаластыққа қол жеткізілді.
Сондай-ақ кездесу аясында мемлекет басшысы Қазақстан мен Өзбекстан арасындағы көлік қатынасы мен мәдени-гуманитарлық қатынастардың даму деңгейін жоғары бағалады.
“Қазақстан мен Өзбекстан айтарлықтай дәрежеде бір-бірімен ынтымақтастықты дамытуға ғана емес, сонымен қатар бірқатар мәселелерді өзара толықтыруға мүдделі. Сондықтан табыс иек астында. Оның үстіне біз, әріптесім, Өзбекстан президенті Шавкат Мирзиеевпен жан-жақты ынтымақтастықты дамытуда ең белсенді болуға келістік”, – деді Қасым-Жомарт Тоқаев.
Өз кезегінде, Өзбек парламентінің спикері Қасым-Жомарт Тоқаевқа қабылдағанына алғыс айтып, Өзбекстан Республикасы Президентінің сәлемін жеткізді.
“Сіздің мемлекет басшысы лауазымына сайлануыңыз – Сіздің алдыңғы лауазымдағы жұмысыңыздың мойындалуы, Сіз тәжірибелі дипломатсыз, ықпалды басшы және ең бастысы, Қазақстан экономикасын дамыту және мемлекеттік қауіпсіздікті нығайту бойынша өте күшті саясат жүргізген Тұңғыш Президент Нұрсұлтан Назарбаевтың идеяларын жалғастырушысыз”, – деді Танзила Нарбаева.
Сурет: akorda. kz
