Қазақстан Республикасының Президенті Қасым-Жомарт Тоқаев Бас прокурор Ғизат Нұрдәулетовпен кездесу өткізді,деп хабарлайды Қазақстан президентінің баспасөз қызметі.
Кездесу барысында Қасым-Жомарт Тоқаевқа елдегі заңдылық пен құқық тәртібінің жай-күйі туралы жоспар ұсынылды.
Нұрдәулетов республикада қылмыс деңгейінің көрсеткіші айтарлықтай төмендегенін, сондай-ақ азаматтардың конституциялық құқықтарын қорғау бойынша жүргізіліп жатқан жұмыстар туралы баяндады.
Сонымен қатар, Бас прокурор Тоқаевты қылмыстық және әкімшілік өндірістің электрондық іске асырылу барысы туралы хабардар етті.
Өз кезегінде Қазақстан Президенті өмірдің барлық салаларында заңның үстемдігін қамтамасыз ету жөніндегі жұмысты жалғастыру қажеттігін атап өтті.
“Прокуратура органдары әлеуметтік және басқа да мемлекеттік бағдарламаларға бөлінген бюджет қаражатын пайдалану кезінде заңдарды қатаң сақтауға қол жеткізуі керек. Заңдылықты бұзудың жолын қатаң кесу қажет”, – деді Қазақстан Президенті.
Кездесу соңында Тоқаев Бас прокурорға қадағалау органының алдында тұрған негізгі міндеттерді жүзеге асыруды тапсырды.
Сурет: Nur.kz
