Мемлекет басшысы Президент Әкімшілігі Басшылығының, Премьер-Министрдің орынбасары, қауіпсіздік Кеңесі хатшысының, ұлттық қауіпсіздік комитеті төрағасының, сыртқы істер, қорғаныс, ішкі істер министрлерінің, қарулы күштер бас штабы бастығының қатысуымен кеңес өткізді, деп «ҚазАқпарат» ХАА Ақорданың баспасөз қызметіне сілтеме жасап хабарлайды.
Сыртқы істер министрі Мұхтар Тілеуберді, сондай-ақ басқа да ведомстволардың басшылары Таяу Шығыстағы ағымдағы жағдай туралы баяндады.
Таяу Шығыстағы жағдайдың күрт ушығуына алаңдаушылық білдіре отырып, Қазақстан Президенті жағдайды сауықтыру барлық тартылған тараптардың барынша ұстамдылығы, дипломатиялық әдістер мен құралдарды, ең алдымен БҰҰ арқылы, сондай-ақ екі жақты байланыстар мен келіссөздер арқылы қолдану болатынын атап өтті.
Кеңес қорытындысы бойынша Мемлекет басшысы Таяу Шығыстағы қазақстандық шетелдік мекемелер мен олардың қызметкерлерінің қауіпсіздігін қамтамасыз етуді, Қазақстандағы шетелдік дипломатиялық өкілдіктердің, шетелдік компаниялар кеңселерінің қауіпсіздігін қамтамасыз ету бойынша шаралар қабылдауды, біздің мемлекеттің ұлттық мүдделері үшін практикалық маңызы бар ақпаратты алу және талдау мақсатында жұмысты күшейтуді тапсырды. Халықаралық жағдайдың шиеленісуі жағдайында Қазақстанның әлеуметтік-экономикалық даму және қорғаныс әлеуетін нығайту мәселелеріне ерекше назар аударылатын болады.
Сурет: inform.kz
