Республикамыздың көшбасшысы Қасым-Жомарт Тоқаевтың төрағалығымен ішкі істер министрлігінің кеңейтілген алқа отырысы өтті, деп хабарлайды мемлекет басшысының баспасөз қызметі.
Президент өз сөзінде құқық қорғау жүйесінде еңбекақы деңгейі төмен екенін айтты. Осыған байланысты Тоқаев үкіметке үш жыл ішінде құқық қорғау органдарының жалақысын 30%-ға арттыруды тапсырды.
Мемлекет басшысы жыл сайын республикалық бюджеттен құқық қорғау органдарының қызметкерлеріне тұрғын үй өтемақысына 15 миллиард теңгеден астам қаражат бөлінетінін еске салды. Сонымен қатар, ол келесі жылдың қаңтар айынан бастап осы мақсатқа қосымша тағы 10 миллиард теңге бағытталатынын атап өтті.
“Осылайша, бұл қолдау шарасымен кезекші бөлімдердің, қарауылдық қызметтердің, мамандандырылған күзет ұйымдарының, ведомстволық оқу орындарының және қылмыстық атқару жүйесінің қызметкерлері, жалпы алғанда сегіз мыңнан астам адам қамтылады”, – деді Президент.
Сондай-ақ, Қасым-Жомарт Тоқаев, оның тапсырмасы бойынша, коронавирустық инфекцияның алғашқы өршуі кезеңінде эпидемияға қарсы іс-шараларға тартылған тәртіп сақшыларына сыйақы төлеуге 6,6 миллиард теңге бағытталғанын атап өтті. Президент полицейлерге сыйақы төлемі үшін тағы 11,5 миллиард теңге қарастырылғанын айтты.
Сурет: ainews.kz
