Қазақстан Президенті түркітілдес мемлекеттер ынтымақтастығы кеңесінің Бас хатшысы Бағдад Әміреевті қабылдады, деп “ҚазАқпарат” ХАА Ақорданың баспасөз қызметіне сілтеме жасап хабарлайды.
Кездесу барысында Қасым-Жомарт Тоқаевқа Кеңес қызметінің негізгі бағыттары және оны одан әрі дамыту перспективалары туралы ақпарат берілді. Атап айтқанда, Бағдад Әміреев Мемлекет басшысына Ұйымның алдағы жоғары деңгейдегі іс-шараларына дайындығы, түркі кеңесінің мәртебесін толыққанды халықаралық ұйымға дейін көтеру жөніндегі жұмысы, сондай-ақ ТМЫК қызметінің экономикалық және инвестициялық бағыттары туралы хабарлады. Президент кеңестің түркі мемлекеттері арасындағы интеграцияны нығайту ісіндегі күш-жігерін оң бағалап, оның қызметінің экономикалық блогын күшейтуге назар аударды. Атап айтқанда, түркі инвестициялық қорын құрудың маңыздылығын атап өтті, оның қызметі ТМЫК-ға кіретін елдердің шағын және орта бизнесі арасындағы кооперацияны дамытуға ықпал ететін болады.
