Президент Қасым-Жомарт Тоқаевтың төрағалығымен реформалар жөніндегі Жоғары Кеңестің отырысы өтті, онда Мемлекет басшысы елдегі құқықтық реформалар туралы айтты, деп zakon.kz хабарлайды.
Құқықтық реформалар туралы айта келіп, Президент әділ сот төрелігін қамтамасыз ету мақсатында сот жүйесін дәйекті де жүйелі жаңғыртудың маңыздылығын атап өтті.
Бұл-құқықтық мемлекеттің аса маңызды өлшемі, инвестициялық тартымдылықтың, жеке меншік құқығын қорғауды қамтамасыз етудің базисі. Сот жүйесін реформалаудың жаңа тәсілдері судьялардың тәуелсіздігін одан әрі нығайтуды қамтамасыз етуге, қоғамның соттарға деген сенімін нығайтуға, сот төрелігін іске асыруға жаңа кәсіби кадрларды тартуды ынталандыруға, сот процесінің ыңғайлылығы мен тиімділігін арттыруға тиіс, – деп санайды ол.
Қасым-Жомарт Тоқаев пысықталған құралдар судьялық мамандыққа мықты заңгерлер мен құқықтың жекелеген салалары бойынша мамандарды тартуға мүмкіндік беретінін айтты.
Президенттің пікірінше, бұл мәселелерді Парламентте пысықтау қоғам мен заң қоғамдастығының өкілдерін тарта отырып, ашық әрі жан-жақты болуға тиіс. Ол ағымдағы жылы тиісті заң жобасын қабылдауды тапсырды.
Бұл реформа өте маңызды, шын мәнінде бұл Қазақстанды қазіргі заманғы және тиімді мемлекетке айналдыруға бағытталған барлық жұмыстың басым бағыты, – деп сенеді ол.
Мемлекет басшысы қылмыстық процесті реформалау туралы да айтып, азаматтардың конституциялық құқықтарын қорғауды қамтамасыз ету жөніндегі жұмыстың басымдығын атап өтті.
Бұл үшін прокурорлар мен адвокаттардың сотта нақты жарыспалылығына жағдай жасалуға, сот шешімдеріне шағымдану үшін мүмкіндіктер кеңейтілуге, бірыңғай сот практикасы қамтамасыз етілуге тиіс. Қорытынды сот үкімі процеске қатысушыларға да, жалпы қоғамға да түсінікті болуы тиіс, – деді Президент.
Қасым-Жомарт Тоқаев саяси, сот, экономикалық және әлеуметтік салалардағы барлық өзгерістерді шетелдік әріптестерімізге сауатты жеткізу керектігін айтты. Аталған жұмысты үйлестіру халықаралық ынтымақтастық жөніндегі арнайы өкіл Ержан Қазыханға тапсырылды.
