Президент Қасым-Жомарт Тоқаев сауда және интеграция министрі Бақыт Сұлтановпен кездесті, оның барысында Мемлекет басшысына өткен жылғы сауда жүйесін дамыту қорытындылары, оның ішінде сыртқы және ішкі сауданы кеңейту бойынша қабылданып жатқан шаралар туралы баяндалды.
Кездесу барысында теріс үрдістерге қарамастан, Қазақстан шикізаттық емес экспорт үлесінің оң өсу қарқынын сақтап қалғаны атап өтілді. Президент қазақстандық өнімді өткізу нарықтарының географиясын кеңейтудің және оның бәсекеге қабілеттілігін арттырудың маңыздылығын атап өтті.
Биылғы жылы Еуразиялық экономикалық одаққа төрағалық Қазақстанға өтті және осы тұрғыда Мемлекет басшысы Еуразиялық интеграцияны дамытуға, сауда кедергілерін жоюға және тауарлар мен қызметтердің еркін қозғалысын қамтамасыз етуге ерекше назар аударуды тапсырды.
Қасым-Жомарт Тоқаев Ішкі сауда саласында Бақыт Сұлтановтың алдына ұлттық тауар өткізу жүйесін құру, нарықты отандық өніммен молықтыру үшін жағдай жасау және осы секторды орнықты дамыту жөніндегі жұмыстарды сапалы жеделдету міндетін қойды. Жүйе Өзбекстан, Қырғызстан, Тәжікстан және Ресейдегі көтерме-тарату орталықтары желісінен тұратын Еуразиялық тауар өткізу желісінің негізі болуға тиіс.
Мемлекет басшысы сауда және интеграция министріне отандық өнімді өткізу нарықтарын кеңейту және ЕАЭО шеңберінде және үшінші елдермен кооперациялық жобаларға қатысу тұрғысынан Қазақстанның сауда-логистикалық әлеуетін нығайту жөнінде шаралар қабылдауды тапсырды.
Сурет: gov.kz
