Қазақстан Президенті Қасым-Жомарт Тоқаев Қытай Халық Республикасына ресми сапары аясында Ханчжоу қаласына келді. Бұл туралы Facebook әлеуметтік желісіндегі өзінің ресми бетінде мемлекет басшысының баспасөз хатшысы Берік Уәли мәлімдеді.
“Қазақстан президенті Қасым-Жомарт Тоқаев Қытай Халық Республикасына екі күндік мемлекеттік сапары аясында Ханчжоу қаласына келді. Мемлекет басшысы инновациялық өнімдердің жетекші әлемдік жеткізушісі – Hikvision компаниясының қызметімен танысады. Сонымен қатар, бағдарламада Alibaba компаниясының офисіне бару және Джек Мамен кездесу, Қытай Ұлттық шай мұражайы мен Пагода Лэйфенге бару жоспарланған”, – делінген хабарламада.
Естеріңізге сала кетейік, кеше Қасым-Жомарт Тоқаев Қытайға ресми сапармен келіп, оның аясында қытайлық көшбасшы Си Цзиньпинмен сөйлесіп үлгерді. Кездесу барысында тараптар Ұлы Жібек жолының тұжырымдамасын ұйымдастыру мәселелерін талқылады. Президент қытайлық іскерлік орталармен және премьер-Министрмен бірқатар кездесулер өткізді. Сондай-ақ Мемлекет басшысы қоғамдық ғылымдар академиясында дәріс оқыды.
