Республикамыздың көшбасшысы Қасым-Жомарт Тоқаев Ресей әскери ведомствосының басшысы Сергей Шойгумен кездесті, деп хабарлайды Президенттің баспасөз қызметі.
Кездесу барысында Тоқаев Шойгуға І дәрежелі “Достық” орденін табыс етті. РФ Қорғаныс министрі Қазақстанның жоғары наградаларының бірін әскери саладағы Қазақстан-Ресей ынтымақтастығын дамытуға қосқан үлесі үшін алды.
Осыдан кейін Қасым-Жомарт Тоқаев пен Сергей Шойгу бауырлас екі елдің әскери және әскери-техникалық салалардағы өзара іс-қимылын нығайту мәселелерін талқылады.
Мемлекет басшысы Қазақстан Республикасы мен Ресей Федерациясының әскери ынтымақтастығы туралы жаңа шартқа қол қойылуын қолдады.
Шойгу өз кезегінде бұл келісім біздің еліміз бен Ресей арасында әскери саладағы ынтымақтастық туралы қол қойылған ең терең құжат екенін атап өтті.
Қорғаныс министрі сондай-ақ Президентке қазақстандық әскери қызметшілердің Мәскеуде өткен Ұлы Жеңістің 75 жылдығына арналған парадта лайықты қатысқаны үшін алғыс айтты.
Сонымен қатар, Шойгу Халықаралық Әскери ойындарына Қазақстан командаларының белсенді қатысқанын атап өтті.
Биыл біздің еліміз АрМИ – “Танк биатлоны” байқауына ғана қатысты, ол дәстүр бойынша Мәскеу облысындағы “Алабино” ресейлік полигонының аумағында өтті.
Сурет: akorda.kz
