Еліміздің көшбасшысы Қасым-Жомарт Тоқаев ресейлік “КАМАЗ” компаниясының бас директоры Сергей Когогинді екінші дәрежелі “Достық” орденімен марапаттады. Мұндай марапат халықтар арасындағы достық пен ынтымақтастықты нығайтуға елеулі үлес қосқан азаматтарға беріледі.
Марапаттау рәсімі Нұр-Сұлтанда өтті. Когогинге орденді атқарушы билік басшысы Асқар Мамин тапсырды.
“КАМАЗ” басшысы жоғары награда үшін алғысын білдіріп, мұндай сәттер Қазақстан мен Ресей Федерациясы ұстанатын бағыттың адалдығын растайтынын мәлімдеді.
Когогин өзі басқаратын компания біздің республикамен бірнеше жыл бойы табысты жұмыс істеп келе жатқанын атап өтті. Ол осы жылы Қостанайда “КАМАЗ”маркалы жүк көліктеріне арналған жиынтықтарды шығаратын Қазақстан-Ресей зауыттарының құрылысы басталғанын еске салды.
Сонымен қатар, ол бұл кәсіпорындардың іске қосылуы бүкіл Еуразиялық қоғамдастық үшін жоғары технологиялық өндіріс құрудағы нақты серпіліс болатынын атап өтті.
Когогин Қазақстан мен “Камаздың” бірлескен жобалары Қазақстан-Ресей қарым-қатынастарын одан әрі дамытуға ықпал ететініне сенім білдірді.
