Мемлекет басшысы Қасым-Жомарт Тоқаев Чех Республикасы парламенті депутаттары палатасының спикері Радек Вондрачекпен кездесті. Бұл туралы Ақорданың баспасөз қызметі хабарлады.
Кездесу барысында қатысушылар Қазақстан-ЕО, Орталық Азия – ЕО және Орталық Азия – Вышград төрттігі сияқты көпжақты форматтағы Қазақстан-Чех қарым-қатынастарын кеңейту және өзара әрекет жөнінде бірқатар мәселелерді талқылады.
Мемлекет басшысы Чех Парламентінің төрағасын “Барқыт төңкерістің” 30 жылдығымен, НАТО-ға кіруінің 20 жылдығымен және алдағы Чех Республикасының құрылған күнімен құттықтады.
Сонымен қатар, Қасым-Жомарт Тоқаев екі мемлекет арасындағы екіжақты ынтымақтастықты одан әрі нығайтуға сенім білдірді.
“Сіздің сапарыңыз біздің елдеріміздің парламенттері арасындағы өзара іс-қимылды нығайту тұрғысынан ғана емес, сондай-ақ екіжақты ынтымақтастыққа жаңа серпін беру тұрғысынан да үлкен маңызы бар”, – деді Тоқаев.
Өз кезегінде, Чехия парламентінің спикері Қазақстан Президентіне қабылданғаны үшін алғыс айтып, республикамызда жүргізіліп жатқан реформаларды жоғары бағалады.
“Мен Чех Республикасының өкілі бола отырып, достық пен дәстүрлі ынтымақтастық рухында дамып келе жатқан еліміз арасындағы тығыз және өзара терең қарым – қатынасымызды растауға мүмкіндігім бар екеніне өте қуаныштымын”, – деді Радек Вондрачек.
