Қазақстан Президенті Найроби халықаралық конвенциясын ратификациялау туралы Заңға қол қойды, деп хабарлады Ақорда.
Мемлекет басшысы «2007 жылғы суға батқан кемелерді жою туралы Найроби халықаралық конвенциясын ратификациялау туралы» Қазақстан Республикасының Заңына қол қойды», — делінген сәрсенбі күнгі хабарламада.
Естеріңізге сала кетейік, Найроби конвенциясы теңіз апатының салдарын жедел жоюды, соның ішінде суға батқан кемелерді көтеруді және теңіз ортасының ластануын болдырмауды қамтамасыз ету үшін бірыңғай қағидалар мен рәсімдерді жасауға бағытталған.
Конвенция халықаралық теңіз ұйымының қолдауымен қабылданды. Оған 53 мемлекет қосылды.
«Қазақстан үшін бұл құжатқа қол қою маңызды. Конвенцияны ратификациялау теңіз апаты туындағанда елдің мүдделерін қорғау үшін қажетті жағдайлар жасауға мүмкіндік береді және:
— қазақстандық суларға кіретін кеме иелерінің өз жауапкершілігін сақтандыру не суға батқан кемені көтергені үшін өзге де қаржылық қамтамасыз ету міндетін белгілеу. Сондай-ақ, бұл Қазақстанға кеме иесінің қатысуынсыз тікелей сақтандыру компаниясына кемені көтеру шығындарын өтеу туралы талап қоюға мүмкіндік береді;
— жалау-мемлекеттің теңіз әкімшілігінен кеме иесінің кемені көтеру және апаттың салдарын жою бойынша өз міндеттемелерін орындауында оларға берілген сақтандыру куәлігі түрінде кепілдік алу;
— Қазақстанның теңіз әкімшілігінің, кеме иесінің және шетелдік кеменің теңіз әкімшілігінің теңіз апаты туындаған жағдайда іс-қимыл тәртібін айқындау», — деп жазады ҚР ИИДМ баспасөз қызметі.
