Қазақстан Президенті Қасым-Жомарт Тоқаев бұқаралық ақпарат құралдары қызметкерлерінің кәсіби мерекесіне орай өткен салтанатты жиналыс барысында БАҚ өкілдері ұлттық қоғамдық сенім кеңесінің құрамына кіруі тиіс екенін хабарлады. Бұл туралы “Қазақпарат” ақпарат агенттігі жазды.
“Мен сайлау алдындағы тұғырнамамда саяси жүйені өзгерту міндетін қойдым. Оның негізінде-мемлекеттік органдар жұмысының ашықтығы, жалпыұлттық міндеттерді шешуде БАҚ пен мемлекеттік органдардың өзара сындарлы іс-қимылын нығайту. Мен барлық деңгейдегі мемлекеттік органдар басшыларына онлайн-қабылдау, жеке блогтар ашуды тапсырдым. Өздеріңіз білесіздер, мен ұлттық қоғамдық сенім кеңесін құруға бастамашылық жасадым. Қазір оның құрамы бойынша кеңес жүргізілуде. БАҚ өкілдері кеңес құрамына кіруі тиіс деп санаймын”, – деп атап өтті Қасым-Жомарт Тоқаев.
Қазақстан Президенті социумда және саясатта үнемі көптеген оқиғалар орын алып отырғанын, сондықтан мемлекет пен қоғамда журналистердің рөлі айтарлықтай артып отырғанын атап өтті.
“Отандық медиақоғамдастықты салауатты біріктіру, журналистердің жауапты азаматтық ұстанымы, олардың объективтілігі – ақпараттық кеңістіктегі табысты жұмыстың құрамдас бөлігі. Өз тарапынан мемлекет БАҚ-ты қолдауды жалғастырады”, – деп қорытындылады Қасым-Жомарт Тоқаев.
Сурет: Inform.kz
