Қазақстан президенті Қасым-Жомарт Тоқаев Ұлттық Банк Төрағасы Ерболат Досаевты қабылдады, деп “ҚазАқпарат” ХАА Ақорданың баспасөз қызметіне сілтеме жасап хабарлайды.
Мемлекет басшысы ағымдағы жылдың І тоқсанындағы ақша-несие саясатын іске асырудың алдын ала қорытындылары туралы есепті тыңдады. Ұлттық Банк Төрағасы сондай-ақ әлемдік экономиканы қалпына келтіру үшін негізгі тәуекелдерді бағалауды ұсынды. Қасым-Жомарт Тоқаевқа Елдің 2020 жылғы Төлем балансы, жалпы халықаралық резервтердің жай-күйі, сондай-ақ алтын портфелін хеджирлеу тәсілдері туралы ақпарат берілді. Ерболат Досаев Қазақстан азаматтарының зейнетақы жинақтарын мерзімінен бұрын пайдалану тетігін іске асыруға және ұлттық төлем жүйесін құруға қатысты Президент тапсырмаларының орындалуы туралы баяндады, сондай-ақ тұрғын үй саясатын реформалау жөніндегі ұсыныстарды айтты. Кездесу қорытындысы бойынша Мемлекет басшысы бірқатар нақты тапсырма берді.
