Біздің еліміздің президенті Қасым-Жомарт Тоқаев Мәскеуге сапары барысында Кремльде Ұлы Жеңістің мерейтойы құрметіне арналған салтанатты қабылдауға қатысты.
Салтанатты қабылдауда жиналғандардың алдында сөз сөйлеген Ресей президенті Владимир Путин Ұлы Отан соғысының ардагерлеріне, сондай-ақ өткен және болашақтағы жеңістері үшін тілек сөз айтты.
Өз сөзінде Ресей Федерациясының басшысы бұрынғы КСРО елдерінің көшбасшыларына Мәскеуге Ұлы Жеңіске арналған салтанатқа қатысу үшін келгендеріне алғыс білдірді.
«Бәрімізге белгілі індетке қарамастан, Ұлы Отан соғысы Жеңісінің 75 жылдығына арналған салтанатты іс-шараға қатысуға Мәскеуге келгендеріңіз үшін Сіздерге тағы да алғыс айтқым келеді. Мен айтып өткенімдей, бұл айқын: біздің халықтарымыз үшін бұл өте маңызды, аса қымбат оқиға», — деді Путин.
Қасым-Жомарт Тоқаевтың Ресей Федерациясының астанасына сапары Владимир Путинмен әңгімелесуден басталды, содан кейін олар Қазақстан десантшыларының қатысуымен өткен әскери шеруге қатысты.
Жеңіс шеруі аяқталған соң, Қазақстан Республикасының басшысы посткеңестік елдерден келген әріптестерімен бірге Александров бақшасына барып, белгісіз сарбаздың қабіріне гүл шоқтарын қою рәсіміне қатысты.
Сурет: sputniknews.kz
