Қазақстан Президенті Қасым-Жомарт Тоқаев “Орталық Азия-Корея Республикасы” форумына қатысу үшін Нұр-Сұлтанға келген Кореяның сыртқы саяси ведомствосының басшысы Кан Ген Хваны қабылдады, деп хабарлайды Ақорданың баспасөз қызметі.
Кездесу барысында екі мемлекет арасындағы екіжақты ынтымақтастықты дамытуға қатысты мәселелер талқыланды. Сонымен қатар,тараптар жоғары деңгейде қол жеткізілген уағдаластықтарды жүзеге асыру барысын қарастырды.
Келіссөздер аясында мемлекет басшысы Қазақстан-Оңтүстік Корея сауда-инвестициялық және технологиялық өзара іс-қимылдың оң динамикасын атап өтті.
“Сіздің Президентіңіздің ағымдағы жылдың сәуір айындағы сапары өте жемісті болды.Сол сапар барысында қол қойылған “Самал жел” бағдарламасы елдеріміз арасындағы ынтымақтастықты дамытуға қосымша серпін беру тұрғысынан өте маңызды болды. Біз экономика мен бизнес саласындағы өзара іс-қимылды одан әрі арттыруға мүдделіміз”, – деді Тоқаев.
Өз кезегінде, Кореяның Сыртқы істер министрі Тоқаевқа Президенті Мун Чжэ Инның құттықтау сөзін тапсырды және Корей тарапының Қазақстан Республикасымен ынтымақтастықты одан әрі кеңейтуге дайындығын растады.
“Біз келесі жылы Сіздің елімізге келуіңізді асыға күтеміз. Менің Президентімнің Қазақстанға сапарының нәтижесі өте жемісті болды. Осы сапар шеңберінде қол жеткізілген уағдаластықтар мемлекетіміздің өзара әрекеттерді одан әрі арттыруға нақты бағыттарды белгіледі. Барлығы дұрыс арнада дамуда.Сіздің Оңтүстік Кореяға сапарыңыз ынтымақтастығымыздың жаңа көкжиегін ашуы үшін бар күш – жігерімізді жұмсаймыз”, – деді Корея министрі.
