Қазақстан Республикасының Басшысы Қасым-Жомарт Тоқаев “2014 жылғы 29 мамырдағы Еуразиялық экономикалық одақ туралы шартқа өзгерістер енгізу туралы хаттаманы ратификациялау туралы”Заңға қол қойды. Бұл туралы Президенттің Баспасөз бөлімінде айтылды.
Бұл хаттамаға Армения астанасында өткен жылдың 1 қазанында қол қойылды. Құжатта ЕАЭО-ға қатысушы елдер арасында кедендік әкелу баждарының сомаларын бөлудің жаңа нормативтері бекітілді. Бұл ретте біздің еліміз үшін норматив 6,955 пайыз деңгейінде айқындалған.
Бұған дейін Қазақстанның сауда және интеграция министрлігінің басшысы Бақыт Сұлтанов осы Хаттамаға сәйкес ЕАЭО-ның қолданыстағы құқығындағы кемшіліктерді жою, сондай-ақ Шарттың бірқатар ережелерін нақты түзету көзделгенін атап өткен болатын. Бұл түзетулер үш негізгі блокқа бөлінген.
“Бәсекелестік саласында өзгерістер енгізілуде. Олар превентивті сипаттағы шараларды қолдануға мүмкіндік беретін “жұмсақ” құқық институтын енгізумен байланысты. Атап айтқанда, бұл трансшекаралық нарықтардағы бәсекелестіктің жалпы ережелерін бұзуға жол бермеу үшін ескертулер беруді және ескертулер шығаруды көздейді”, – деді Сұлтанов.
Ол “жұмсақ” құқық институтын енгізу шаруашылық жүргізуші субъектілерге тергеп-тексеру жүргізбей трансшекаралық нарықтардағы бәсекелестіктің бірыңғай қағидаларының бұзылу белгілерін өздері жоюға мүмкіндік беретінін нақтылады. Бұл шара, өз кезегінде, бес елдің шаруашылық жүргізуші субъектілеріне жүктемені азайтады.
Сурет: mail.kz
