Қазақстан Республикасының басшысы Қасым-Жомарт Тоқаев қазір ЕАЭО-ға мүше елдер коронавирустық инфекцияны диагностикалау және емдеу мәселелері бойынша өзара іс-қимылды күшейту керектігін мәлімдеді. Бұл туралы Президенттің баспасөз қызметі хабарлайды.
Мұндай мәлімдемені Мемлекет Басшысы Жоғары Еуразиялық экономикалық кеңестің бейнеконференцбайланыс режимінде өтіп жатқан жұмыс кездесуінде жасады.
Сондай-ақ, бейнеконференция барысында Қасым-Жомарт Тоқаев Одаққа мүше мемлекеттер ғылыми салада ынтымақтастықты нығайту қажет деп мәлімдеді.
“Біздің елдерде карантиндік режимді енгізуге байланысты сандық тауарлар мен қызметтерге сұраныстың ұлғаюына куә болдық. Біз сандық инфрақұрылымның сапасы мен сенімділігінің сөзсіз маңыздылығына көз жеткіздік. Кеден қызметтерін цифрландырудан бастап Fintech бойынша бірлескен әзірлемелерге дейін алдыңғы қатарлы, сапалы сандандыруды енгізу интеграциялық жұмыстың барлық бағыттарының тиімділігін анықтайды”, – деді президент.
Эпидемияға қарсы күрес туралы айта келе, Қазақстан Президенті Жоғары Еуразиялық экономикалық кеңес мүшелері бүгінде бірлескен мәлімдеме әзірлегенін атап өтті. Тоқаевтың айтуынша, құжатта COVID-19-ға қарсы әрекет етуге және Одақ елдерінде экономикалық тұрақтылықты қамтамасыз етуге бағытталған шаралар көрсетілген.
Қасым-Жомарт Тоқаев ЕАЭО елдері коронавирус тудырған дағдарысты еңсеретінін атап өтті. Сонымен қатар, ол одақ мемлекеттері жаңа сын-қатерлерге дайын болу үшін осы кезеңде қабылданған тәжірибеге талдау жасауы тиіс екенін айтты.
Сурет: regnum.ru
