Бірқатар мемлекеттердің жаңадан тағайындалған елшілері Республика басшысы Қасым-Жомарт Тоқаевқа сенім грамоталарын тапсырды, деп хабарлайды kapital.kz ақпарат ресурсы.
Салтанатты рәсім Қазақстан Президентінің резиденциясында өтті. Тоқаевқа сенім грамоталарын Оман елшісі Мұхаммед бен Абдулла бен Салих әл-Бахрани, Корея елшісі Кү Хонг-сок және Бразилия елшісі Рубен Антонио Корреа Барбоза табыс етті.
Сенім грамоталарын алып, Қазақстан басшысы елшілерді біздің республикадағы дипломатиялық миссияның басталуымен құттықтап, олардың жұмысына табыс тіледі. Сонымен қатар, ол дипломаттар елдер арасындағы ынтымақтастықты дамытуға үлес қосатынына сенім білдірді.
«Сіздер бізге бүкіл әлем пандемиядан зардап шеккен қиын уақытта келдіңіздер. Қазақстан осы қауіпті ауруды жеңуде уақтылы шешім қабылдап жатыр. Бұл оңай емес, бірақ біз халықаралық ынтымақтастыққа сүйенеміз, БҰҰ-ның күш-жігерін қолдаймыз және барлық елдер осы ауруды бірлесіп еңсереді деп үміттенеміз», — деп атап өтті Қасым-Жомарт Тоқаев.
Сондай-ақ, іс-шара кезінде Қасым-Жомарт Тоқаев Қазақстанның Бразилия, Оман және Кореямен жақсы қарым-қатынасын атап өтіп, осы елдердің басшыларына құттықтау сөзін жолдады.
Бүгінгі күні Қазақстанда COVID-19 жұқтырудың 41065 жағдайы ресми түрде расталды, олардың ең көп саны Алматыда — 5501 жағдай анықталды.
Сурет: akorda.kz
