Уәкілетті органдар ерекше қажеттіліктері бар бала мен оның отбасы үшін бірыңғай маршрут түрінде іс-қимылдың түсінікті алгоритмін жасауы тиіс, деді Қазақстан Президенті Қасым-Жомарт Тоқаев Ұлттық қоғамдық сенім кеңесінің отырысында.
“Сондай-ақ, ерекше қажеттіліктері бар балаларды арнайы психологиялық-педагогикалық қолдауға мемлекеттік білім беру тапсырысын енгізу қажет. Бұл үлкен бюджеттік шығындарсыз балаларды осы қызметтермен қамтуды едәуір арттыруға мүмкіндік береді”, — деп Тоқаев отырыста тапсырды.
Жалпы, оның айтуынша, үкімет үш бейінді: білім және ғылым, денсаулық сақтау, еңбек және халықты әлеуметтік қорғау министрліктерінің ведомствоаралық өзара іс-қимылын ерекше бақылауға алуы керек.
Ол 2021-2023 жылдарға арналған Жол картасының сапалы орындалуын қамтамасыз ету, ерте жастағы балалардың скринингін жақсарту, алғашқы медициналық-санитарлық көмек ұйымдары жанындағы әлеуметтік қызметтердің жұмысын күшейту қажеттігін айтты.
“Уәкілетті органдар ерекше қажеттіліктері бар бала мен оның отбасы үшін бірыңғай маршрут түрінде іс-қимылдың түсінікті алгоритмін жасауы тиіс. Өңірлерде бар арнаулы мекемелерді ескере отырып, онда бала туған кезден бастап мемлекет көрсететін барлық қызметтер көзделуге тиіс. Білім және ғылым министрлігі ерекше балалардың білім алуға құқықтарын іске асыру бөлігінде барынша екпінді жұмыс жүргізуі керек. Бұл шаралардың барлығы ерекше қажеттіліктері бар балалардың әлеуетін толыққанды іске асыруға ықпал ететініне сенімдімін”, — деді Мемлекет басшысы.
Сурет: zakon.kz
