Мемлекет басшысы Қасым-Жомарт Тоқаев “Ұлытау – 2019” халықаралық туристік форумы аясында біздің еліміз шетелдік және отандық туристер үшін тартымды орындардың бірі бола алатынын мәлімдеді, деп хабарлайды Ақорданың баспасөз қызметі.
Сонымен қатар, Қазақстан Президенті туристердің санын артыратын мемлекеттік бағдарлама туралы айтты.
“Біз салалық мемлекеттік бағдарламаны қабылдадық. Оны толық жүзеге асыру ЖІӨ-дегі туризм үлесін 8%-ға дейін арттыруға мүмкіндік береді. Келушілердің саны 9 млн-ға дейін, ал ішкі туристердің саны 8 млн-ға дейін өсуі тиіс. Бұл салада жұмыспен қамтылғандардың санын 650 мың адамға жеткізу керек”, – деді Тоқаев.
Сондай-ақ мемлекет басшысы шетелдік және біздің туристерімізге Қазақстан туралы барлық қажетті ақпаратты беретін арнайы қосымшаны әзірлеу қажеттігін мәлімдеді.
“Туризм индустриясынан елеулі мультипликативтік нәтижені ескере отырып, Қазақстанның барлық рекреациялық аймақтарында қонақ үйлер, тамақтану, демалыс орындарын салу үшін, оның ішінде “Атамекен” ҰКП мүмкіндігі арқылы кәсіпкерлерді барынша тарту керек”, – деп қортындылады президент.
