Мемлекет Басшысы Қасым-Жомарт Тоқаев біздің республикамызда тіркелген шетелдік дипломатиялық миссиялардың басшыларымен кездесу өткізді. Бұл туралы Қазақстан Президентінің баспасөз қызметі хабарлады.
Кездесу басында Президент Тоқаев шетелдік дипломатиялық миссиялардың басшыларына еліміздің мемлекеттік жүйесінің негізі “Қуатты президент – ықпалды парламент – есеп беретін үкімет” деген формула болып табылатынын айтты.
Сонымен қатар, мемлекет басшысы “еститін” мемлекет тұжырымдамасының орындалу барысы және Ұлттық қоғамдық сенім кеңесінің жұмысы туралы хабарлады. Кездесуге қатысушылар Қазақстанның сот және құқық қорғау жүйесіндегі реформалар туралы хабардар болды.
Біздің еліміздің халықаралық ынтымақтастыққа ашық екенін растай отырып, Қасым-Жомарт Тоқаев Қазақстанның сыртқы саясатының басым векторлары Ресеймен, Қытаймен, АҚШ-пен, сондай-ақ Орталық Азия аймағы мен Еуроодақ елдерімен өзара қарым-қатынас болып табылатынын атап өтті.
Президент біздің республикамыз алдағы уақытта да қаржы институттары мен халықаралық ұйымдар аясындағы көпжақты ынтымақтастықты кеңейтуге бағытталған жұмыстарды жүргізетінін мәлімдеді.
Сонымен қатар, Қасым-Жомарт Тоқаевтың айтуынша, екіжақты және көпжақты ынтымақтастықты нығайтуға бағытталған мұндай кездесулер дәстүрге айналды.
Сурет: akorda.kz
