Қазақстан президенті Қасым-Жомарт Тоқаев еліміздің Қарулы Күштерін 2019 жылғы халықаралық Әскери ойындарда үшінші орын алуымен құттықтады. Бұл туралы мемлекет басшысының баспасөз қызметі хабарлады.
“Қазақстан Қарулы Күштерінің командасын әскери ойындарда табысты өнер көрсетуімен құттықтаймын. Сіздер жоғары кәсібилікті, жауынгерлік дағдыны көрсетіп, 39 команда арасында лайықты 3-ші орынға ие болдыңыздар.Жауынгерлік еңбекте жаңа табыстар тілеймін!”- деді Тоқаев.
Мәскеулік “Алабино” полигонының “Патриот” саябағында халықаралық Әскери ойындары – 2019-дың жабылу салтанаты өтті.
АрМИ-2019 жабылу рәсіміне Қазақстан Қорғаныс министрі Нұрлан Ермекбаев қатысты. Ол шетелдік әріптестерімен кездесу өткізіп, әскери саладағы ынтымақтастық мәселелерін талқылады.
Естеріңізге сала кетейік, АрМИ-2019-дың үш байқауы Қазақстан Республикасының аумағында өтті. Біздің әскери қызметкерлер бірнеше рет жоғары нәтижелер көрсетті.
