Қазақстан президенті Қасым-Жомарт Тоқаев “Astana Ютария Ltd” өндірістік-инновациялық компаниясында болды. Бұл туралы Ақорданың баспасөз қызметі хабарлады.
Мемлекет басшысы жұмыс сапары барысында кәсіби тігін жабдығын құрастырумен және жеткізумен айналысатын жоғарыда аталған компанияның қызметімен танысты. Сондай-ақ, кәсіпорын арнайы киім және басқа да тұрмыстық, техникалық мақсаттағы бұйымдарды шығарады.
Қасым-Жомарт Тоқаев осы кәсіпорынның жұмысына және шығарылатын өнімнің сапасына оң баға беріп, компанияның экспорттық мүмкіндіктеріне назар аударды.
Сонымен қатар, Тоқаев өзінің жұмыс сапары аясында кәсіпорын жұмысшыларымен кездесіп, олардың еңбегін жоғары бағалады.
Мемлекет басшысының айтуынша,әлеуметтік тұрғыдан халықтың осал тобына жұмыс орындарын ашатын кәсіпорындарға біздің елімізде әрдайым қолдау көрсетілетін болады.
“Мен сіздің фабрикаңызды қуана аралап шықтым. Шынында да, бұл жақсы жабдықтары бар қажетті және озық өндіріс, әлеуметтік-жауапты кәсіпорын. Ең бастысы, мұнда сіз сияқты тамаша адамдар жұмыс істейді”, – деді президент.
Өз кезегінде кәсіпорын қызметкерлері Қасым-Жомарт Тоқаевқа келгені үшін алғыс айтып, Қазақстан халқының игілігі жолындағы қызметіне табыс тіледі.
