Қасым-Жомарт Тоқаевқа көлеңкелі экономикаға қарсы іс-қимыл саласындағы жұмысты күшейту жөніндегі тапсырмаларының іске асырылу барысы туралы есеп берілді. Бұл туралы “ҚазАқпарат” ХАА Ақорданың баспасөз қызметіне сілтеме жасай отыра хабарлайды.
Жанат Элимановтың ақпараты бойынша, ағымдағы жылдың басынан бері сегіз ұйымдасқан қылмыстық топтың, оның екеуі трансұлттық топ, қызметінің жолы кесілді. Ол сондай-ақ, бюджет қаражатын жымқыру фактілері бойынша 14 млрд теңгеге залал келтірген, 125 қылмыстық іс қозғалғанын хабарлады. Президентке қаржы пирамидаларының қызметіне жол бермеу жөніндегі агенттіктің жұмысы туралы ақпарат берілді. Ведомство басшысының айтуынша, бүгінгі таңда күдікті операциялар бойынша құқық қорғау органдарына 21 материал жіберілген. Сонымен қатар, мемлекет басшысына қаржылық пирамидаға жол бермеу жөнінде Агенттіктің қабылдап жатқан шаралары туралы баяндалды. Жанат Элиманов 2020 жылдың қорытындысы бойынша өткен жылдармен салыстырғанда тіркелген экономикалық қылмыстар санының алты есе төмендегенін хабарлады. Қылмыстық істерді тергеу шеңберінде кәсіпкерлерден жауап алуға шақырулар саны екі есе, ал тергеу мерзімдері 40%-ға қысқарды. Қасым-Жомарт Тоқаев адал бизнес жүргізетіндерді қылмыстық қудалауға тартуға жол бермеу үшін жүйелі шаралар қабылдау қажеттігіне назар аударды. Соңында Президент Қаржы мониторингі агенттігінің төрағасына бірқатар нақты тапсырмалар берді.
