Қазақстан Президенті Қасым-Жомарт Тоқаев Қарағанды облысының әкімі Жеңіс Қасымбекпен кездесті. Бұл туралы Ақорданың баспасөз қызметі хабарлады.
Кездесу барысында Мемлекет басшысына облыстың әлеуметтік-экономикалық дамуының негізгі көрсеткіштері және ауыл шаруашылығы мен құрылыс салаларындағы өндірістің өсімі туралы есеп берілді.
Тоқаев Қарағанды облысы аумағында, соның ішінде көп балалы отбасылар үшін тұрғын үй құрылысының қарқынын жеделдетуге шақырды. Сондай-ақ, ол атаулы әлеуметтік көмек көрсету және осы көмекті алатын еңбекке қабілетті тұрғындарды жұмыс орындарымен қамтамасыз ету бойынша жұмыстардың маңыздылығын атап өтті.
Қасымбек Президентке облыс аумағында туристік кластерді құру перспективалары және Балқаш пен Қарқаралы ауданында туризм саласын жаңғырту туралы айтып берді.
Кездесу соңында Қасым-Жомарт Тоқаев әкімге өңірдегі су тасқыны жағдайын мұқият қадағалап, төтенше жағдайлардың алдын алуға ықпал ететін бірқатар дайындық шараларын өткізуді тапсырды.
Сурет: inform.kz
