Қазақстан президенті Қасым-Жомарт Тоқаев еліміздің Жоғарғы сотының басшысы Жақып Асановпен кездесті. Бұл туралы мемлекет басшысының баспасөз қызметі хабарлады.
Кездесу барысында Асанов Жоғарғы соттың ағымдағы жылдың тоғыз айындағы қызметінің нәтижесі туралы баяндады. Сонымен қатар, мемлекет басшысы сот жүйесін жаңғырту бойынша жүргізіліп жатқан жұмыстар туралы хабардар етілді.
Жоғарғы сот төрағасы Қасым-Жомарт Тоқаевқа сот кадрларын іріктеу жүйесін жетілдіруге, бірыңғай сот тәжірибесін қамтамасыз етуге және сот төрелігін жаңғыртуға бағытталған қабылданып жатқан шаралар туралы хабарлады.
Өз кезегінде президент судьялар қызметіне халықтың сенімін арттыру және шығарылатын сот үкімдерінің сапасын жақсарту қажеттілігіне назар аударды.
Кездесу соңында мемлекет басшысы Жақып Асановқа судьяларға жүктемені төмендетуге бағытталатын барлық шараларды қабылдауды тапсырды, сондай-ақ судьялар корпусының құзыреттілігін арттыру бойынша жұмысты жалғастыру қажеттігі туралы мәлімдеді.
Сурет: Bnews.kz
