Қазақстан президенті Қасым-Жомарт Тоқаев Қарулы күштер мен елордалық әкімдіктің Нұр-Сұлтанда төтенше жағдай режимін қамтамасыз етуге дайындығын тексерді, деп хабарлады Ақорданың баспасөз қызметі.
Еліміздің қорғаныс ведомствосының басшысы Нұрлан Ермекбаев пен елорда әкімі Алтай Көлгінов Қасым-Жомарт Тоқаевтың алдында әскери міндеттілерді арнайы жиынға шақыру, эпидемияға қарсы күрестегі әскери қызметшілердің жарақтандырылуы, Астананы дезинфекциялау және қосымша жұқпалы аурулар госпиталін салу туралы есеп берді.
Президент өз кезегінде республиканың ірі қалаларында ауқымды зарарсыздандыру жұмыстарын жүргізу және төтенше жағдай режимінің барлық талаптарын орындау қажеттігі туралы мәлімдеді.
Сондай-ақ, Қасым-Жомарт Тоқаев Нұр-Сұлтандағы клиникалық аурухана құрылысына қатысты мәселелерді қозғады. Оны қысқа мерзімде – екі апта ішінде тұрғызатынын атап өтті. Сондықтан, Президенттің пікірінше, бұл медициналық мекеменің сапасына ерекше көңіл бөлу қажет.
Сонымен қатар, мемлекет басшысы елорданың әскерге шақырылушыларымен кездесу өткізіп, олардың Отан игілігі үшін қызмет етуге дайындығын жоғары бағалады.
“Қазір көпшілігі өз патриотизмі, Отанға деген сүйіспеншілігі туралы айтады, бірақ іске келгенде бәрі ұмытылады. Ал сіздер біздің елге, халыққа, Отанға қызмет ету үшін осында өз еріктеріңізбен келдіңіздер. Бұл үшін баршаңызға шын жүректен алғыс айтқым келеді”, – деді Қасым-Жомарт Тоқаев.
Сурет: akorda.kz
