Біздің республикамыздың көшбасшысы Қасым-Жомарт Тоқаев бүгін Индустрия және инфрақұрылымдық даму министрлігінің басшысы Бейбіт Атамқұловты қабылдады. Бұл туралы Қазақстан Президентінің баспасөз қызметі хабарлады
Кездесу мемлекет басшысын Индустрия министрлігінің ағымдағы жылдың жеті айындағы қызметінің нәтижелерімен таныстыру мақсатында өтті.
Атамқұловтың айтуынша, коронавирус індетіне қарамастан, министрлік барлық салалар бойынша оң нәтижелерге қол жеткізді.
Индустрия министрі құрылыс саласы нәтижелеріне ерекше назар аударды. Ол бүгінгі таңда «Нұрлы жер» мемлекеттік бағдарламасы аясында елімізде 7 миллион шаршы метр тұрғын үй салынғанын айтты.
«Нұрлы жол» мемлекеттік бағдарламасын жүзеге асыру туралы айта келе, Атамқұлов оның аясында қазір республикалық және жергілікті маңызы бар 9,8 мың шақырым автожолдың құрылысы мен қайта жаңғыртылуы жүзеге асырылып жатқанын атап өтті.
Сондай-ақ, Индустрия министрлігінің басшысы индустрияландыру картасын жүзеге асыру аясында осы жылдың соңына дейін Қазақстанның барлық өңірлерінде 160 жобаны іске қосу жоспарланып отырғанын айтты.
Атамқұловтың баяндамасын тыңдаған Тоқаев, оған бірқатар нақты тапсырмалар берді, оның ішінде өңдеу өнеркәсібін одан әрі ынталандыруға және еліміздің ішкі нарығын молықтыру үшін өңделген өнім үлесін арттыруға бағытталған тапсырмалар да бар.
Сондай-ақ, мемлекет басшысы 2020 жылға жоспарланған тұрғын үй көлемін уақтында пайдалануға берудің маңыздылығын айтты.
Сурет: akorda.kz
