Еліміздің президенті Қасым-Жомарт Тоқаев бәсекелестікті қорғау және дамыту агенттігінің басшысы Серік Жұманғаринмен кездесті. Бұл туралы Ақорданың баспасөз қызметі хабарлады.
Кездесуде Тоқаевтың бәсекелестік саласын жетілдіруге қатысты тапсырмаларын орындау мәселелеріне ерекше назар аударылды.
Республика көшбасшысына Қазақстанда бәсекелестікті дамытуға бағытталған ұлттық жобаны әзірлеу, ашық биржалық сауданы іске қосу және медициналық препараттарға бағаларды реттеудің жаңа тәсілдері туралы ақпарат берілді. Сондай-ақ, Қасым-Жомарт Тоқаев нормативтік құқықтық актілердің бәсекелестік жағдайына әсерін бағалауды жүзеге асырумен танысты.
Сонымен қатар, Жұманғарин бәсекелестік саласының кадрлық әлеуетін күшейту мақсатында КАЗГЮУ Университетінің базасында “бәсекелестік құқық” мамандығы бойынша магистрлік білім беру бағдарламасы ашылғанын айтты.
Сондай-ақ, Жұманғарин фармацевтика және газ салаларында жүргізіліп жатқан тергеулер туралы есеп берді.
Агенттік төрағасын тыңдағаннан кейін, мемлекет басшысы оған бірқатар тапсырма берді. Олардың бірі биржалық сауданы дамыту, шағын және орта бизнесті қорғауға байланысты болды.
Сурет: businessfm.kz
